"უპირველეს ყოვლისა, მინდა ვთქვა, რომ ჩვენი მოლოდინი არის ის, რომ მომავალი ექვსი თვე კონცენტრირებულად ვიმუშავებთ იმისათვის, რომ საქართველოს საგარეო საქმეთა სამინისტრომ ჯეროვნად მიიტანოს საქართველოს საკითხი ნატოს სამიტამდე. მოლოდინი არის ის ციტატა, რომელიც მინისტერიალის კომუნიკეშია, რომელშიც საქართველო მოხსენიებულია, როგორც პარტნიორი ქვეყანა, რომელიც დასავლეთ ბალკანეთის ქვეყნებთან ერთად ალიანსში გაწევრიანების გზას ადგას. ეს ძალიან დიდი წინგადადგმული ნაბიჯია, თუმცა არავითარი მოლოდინების გაზრდა არ მინდა, რადგან წინ ბევრი სამუშაო გველოდება", -განაცხადა ვაშაძემ.

რუსეთის საგარეო საქმეთა მინისტრის სერგეი ლავროვის განცხადებაზე ვაშაძემ აღნიშნა, რომ ლავროვი თავის საკუთარ პრეზიდენტს ეწინააღმდეგება. "ჯობია, კარგად წაიკითხოს, თუ რას ამბობს რუსეთის მთავარსარდალი ჩრდილოეთ კავკასიაში 58-ე არმიის ოფიცრებთან შეხვედრისას და როგორ ხსნის ის 2008 წლის აგვისტოს ომს, როდესაც ამბობს, რომ ომის ერთადერთი მიზანი იყო, ხელი შეეშალა საქართველოს ნატოში გაწევრიანებისთვის. არ ვიცი, ღირდა თუ არა რუსეთის საგარეო პოლიტიკისა და რეპუტაციისათვის საქართველოში დანაშაულის ჩადენა და აგრესია, მაგრამ ყველა თავის გზას ირჩევს და ვნახოთ, ეს გზა ვის სად მიიყვანს", -აღნიშნა მინისტრმა.

ვაშაძე უსაფრთხოების საერთაშორისო ოპერაციაში საქართველოს მონაწილოების საკითხსაც შეეხო და აღნიშნა, რომ სულ მალე, ავღანეთის სამხედრო ოპერაციაში საქართველო გახდება ყველაზე დიდი კონტრიბუტორი იმ ქვეყნებს შორის, რომლებიც არ არიან ნატოს წევრები. "ბოლო დროს არ მქონია შეხვედრა, სადაც ხაზი არ გაესვათ იმისათვის, რომ საქართველო არა მარტო რჩება იმ სივრცეში, რაც შემოხაზულ იქნა ბუქარესტის ნატოს სამიტზე; ანუ ის, რომ ჩვენ აუცილებლად გავხდებით ნატოს წევრები, არამედ მადლობას გვიხდიან იმისთვის, რომ ჩვენ უკვე ვიქცევით ისე, როგორც ალიანსის წევრები", - აღნიშნა გრიგოლ ვაშაძემ.